Upptaka frá heimahópnum okkar þann 19.desember 2024

Það er komin tími til að vakna fyrir alvöru og nálgast Drottinn af heilum hug. Það er eina leiðin til að breyta aðstæðum okkar, fá gegnumbrot, lækningu og bænasvör fyrir fjölskyldum, landi og þjóð. Hættum að betla af Guði og tökum okkar stöðu sem hermenn og erindrekar Guðs. Hann sagði okkur að lækna sjúka, reka út illa anda og hjálpa fólki. Hann er búin að greiða gjaldið, krafturinn er til staðar, við þurfum aðeins að nálægja okkur Guði af öllu hjarta í föstu, bæn og helgun, því þá munum við Guð sjá!

Matt 10:8

Læknið sjúka, vekið upp dauða, hreinsið líkþráa, rekið út illa anda. Gefins hafið þér fengið, gefins skuluð þér láta í té.

Jóhannesarguðspjall 14:12

Sannlega, sannlega segi ég yður: Sá sem trúir á mig, mun einnig gjöra þau verk, sem ég gjöri. Og hann mun gjöra meiri verk en þau, því ég fer til föðurins.

Fyrra Korintubréf 4:20

Því að Guðs ríki er ekki fólgið í orðum, heldur í krafti.

Fyrra Korintubréf 15:34

Vaknið fyrir alvöru og syndgið ekki. Nokkrir hafa enga þekkingu á Guði. Yður til blygðunar segi ég það.

Guð blessi þig!

Ef þig langar að prufa að koma í heimahópinn okkar þá ertu hjartanlega velkomin. Við hittumst á Borg í Grímsnesi klukkan 19:15 alla fimmtudaga. Hafðu samband til að fá nánari upplýsingar um heimilsfang og mögulegt far með trúsystkinum ef þú ert til dæmis Í Reykjavík eða nágrenni.

Hebreabréfið 10:25

Vanrækið ekki safnaðarsamkomur yðar eins og sumra er siður, heldur uppörvið hver annan, og það því fremur sem þér sjáið að dagurinn færist nær.

Að þessu sinni í heimahópnum héldum við áfram með efnið sem við vorum byrjuð á varðandi bæn og föstu. Hvernig óvinurinn hefur að því virðist náð að hylja yfir þetta mikla vopn sem, “fasta og bæn” er til að standa gegn djöflinum og fá gegnumbrot inn í líf okkar.

Ef Jesús okkar fullkomna fyrirmynd fastaði og lærisveinarnir þegar þeir voru að starfa í Postulasögunni, þá ætti það að vera augljóst að við þurfum líka að fasta til að lifa í sigri og leiðast af anda Guðs.

Það er hreint út frábær bók sem ég get ekki mælt nógu mikið með sem heitir “The Hidden Power of Prayer and Fasting” eftir Mahesh Chavda sem fer ítarlega í föstu og bæn. Þessi bók er full af kraftaverkum sem Guð gerði í gegnum þjónustu Mahesh Chavda og hvernig Guð notaði líf hans sérstaklega í föstu og bæn til að kenna okkur mikilvægi þessa verkfæris til að sigrast á óvininum.

Hér er linkur á bókina til að panta hana. – The Hidden Power of Prayer and Fasting

Einstakur vitnisburður sem allir ættu að gefa sér tíma til að hlusta á þótt langur sé!

Upptaka frá okkar vikulega heimahóp. Að þessu sinni fórum við í Jakobsbréf 4. kafla og fórum það sem Guð krefst af okkur. Við höfum margar frásögur í Biblíunni varðandi það að koma fram fyrir Drottinn með fórn. Fasta er ein tegund fórnar og svo sannarlega öflugt verkfæri til að lægja holdið og nálægja sig Guði.

Á einum stað í kennslunni tók ég dæmi um konuna sem gaf allt sem hún átti, ég sagði tíeyring en það voru þó ekki nema 2 aurar eða tveir smápeningar. Merkilegt má þó nefna að eftir að kennslunni lauk dró einn trúbróðir upp tíeyring eins og ég hafði nefnt í kennslunni, en hann hafði fundið hann stuttu áður og tekið hann upp af jörðinni. Guð staðfestir sitt Orð og því hvet ég þig til að hlusta og leita Guðs með að fasta fyrir þínu gegnumbroti í Jesú nafni.

Mynd af tíeyringnum tekin þetta kvöld.

Upptaka frá okkar vikulega heimahóp. Það var smá fórn að mæta þetta kvöldið því veðrið var slæmt, mikið rok og rigning. Guð hefur greinileg séð þá fórn og kunnað að meta því Hann mætti okkur á sérstakan hátt með nærveru sinni og áttum við yndislega stund þar sem Guð talaði mjög nákvæmt inn í líf einstaklinga sem þurftu sérstaklega mikið á því að halda. 

Ef þig langar að prufa að koma í heimahópinn okkar þá ertu hjartanlega velkomin. Við hittumst á Borg í Grímsnesi klukkan 19:15 alla fimmtudaga. Hafðu samband til að fá nánari upplýsingar um heimilsfang og mögulegt far með trúsystkinum ef þú ert til dæmis Í Reykjavík eða nágrenni.

Jakobsbréfið 1:2-4

Álítið það, bræður mínir, eintómt gleðiefni, er þér ratið í ýmiss konar raunir. Þér vitið, að trúarstaðfesta yðar vekur þolgæði, en þolgæðið á að birtast í fullkomnu verki, til þess að þér séuð fullkomnir og algjörir og yður sé í engu ábótavant.

Guð lagði á hjarta mitt að undirbúa kennslu varðandi að dæma eða ekki dæma. Ég tók eftir að margir kristnir voru mjög dómharðir gagnvart t.d. Kamillu Harris í forsetaframboði Bandaríkjanna. Vissulega var augljóst á stefnumálum flokksins að þar var eitt og annað sem ekki var rétt samkvæmt Orði Guðs, en gefur það okkur leyfi til að dæma? Segir ekki Biblían einmitt að við eigum að elska óvini okkar og biðja fyrir þeim sem ofsækja okkur?

Nú eru einnig kosningar framundan á Íslandi og þá setjast margir í dómarasæti heima í stofu og rífa niður fólkið sem er að bjóða sig fram, þetta má ekki vera svona, því með þeim dómi sem þú dæmir munt þú dæmdur verða. Þetta á einnig við um öll önnur tilvik, ert þú að dæma bróður eða systur, ert þú að eitra með vörum þínum þegar þú talar illa um aðra? Ég mæli með kennslunni sem ég var að setja inn á síðuna en þar er hægt að hlusta á upptöku þar sem ég fór ítarlega í þetta efni í heimahópnum okkar.

Efesusbréfið 4:29

Látið ekkert skaðlegt orð líða yður af munni, heldur það eitt, sem er gott til uppbyggingar, þar sem þörf gjörist, til þess að það verði til góðs þeim, sem heyra.

Lúkasarguðspjall 10:19

Ég hef gefið yður vald að stíga á höggorma og sporðdreka og yfir öllu óvinarins veldi. Alls ekkert mun yður mein gjöra.