Billy Graham

William Franklin Graham Jr., betur þekktur sem Billy Graham, var bandarískur predikari sem varð vel þekktur á alþjóðavettvangi seint á fimmta áratugnum. Einn af ævisöguriturum hans hefur sett hann „meðal áhrifamestu kristinna leiðtoga“ 20. aldar. Hann fæddist 7. nóvember árið 1918 og fór heim til Drottins hér um bil 100 árum síðar eða þann 21. febrúar 2018, 99 ára gamall.

Billy Graham er svolítið öðruvísi en margir af þeim sem ég hef skrifað um hér á síðunni. Hann var ekki fyrst og fremst þekktur fyrir lækningar eða undur og tákn, heldur fyrir einfaldan, skýran og kraftmikinn boðskap um Jesú Krist. Hann stóð frammi fyrir milljónum manna, opnaði Biblíuna og sagði „Biblían segir“, og síðan bauð hann fólki að koma fram og taka á móti Jesú. Talið er að hann hafi predikað fyrir nærri 215 milljónum manna í eigin persónu í meira en 185 löndum og fyrir hundruðum milljóna í viðbót í gegnum útvarp, sjónvarp og kvikmyndir. Ég held að enginn maður í sögunni hafi boðað fagnaðarerindið fyrir jafn mörgum.

Strákurinn á mjólkurbúinu

Billy ólst upp á stóru mjólkurbúi fjölskyldunnar rétt fyrir utan Charlotte í Norður-Karólínu. Foreldrar hans hétu William Franklin og Morrow Graham og það lá beint við að hann yrði bóndi eins og faðir hans og afar. Hann mjólkaði kýr á morgnana áður en hann fór í skólann og draumurinn hans var að verða hafnaboltaleikmaður, ekki predikari.

Haustið 1934 kom farandpredikarinn Mordecai Ham til Charlotte og hélt vakningarsamkomur í ellefu vikur. Billy vildi fyrst ekki fara, en vinur hans fékk hann með sér. Eitt kvöldið, rétt um sextánda afmælisdaginn hans, svaraði hann kallinu og gaf Jesú líf sitt. Hann sagði sjálfur síðar að hann hefði ekki skilið til fulls hvað gerðist þetta kvöld, en hann vissi að eitthvað hafði breyst. Það er svo fallegt að sjá hvernig Guð notar trúfesti eins manns, Mordecai Ham, til að snerta einn ungan strák sem átti síðan eftir að leiða milljónir til Krists. Við vitum aldrei hvaða áhrif það hefur þegar við boðum fagnaðarerindið, jafnvel fyrir einum einstaklingi.

Eftir eina önn í Bob Jones College flutti hann sig yfir í Florida Bible Institute. Þar fann hann sterkt fyrir köllun Guðs til að predika en barðist við hana í langan tíma. Að lokum gafst hann upp fyrir Guði og bað: „Ó Guð, ef þú vilt að ég þjóni þér, þá geri ég það.“ Hann var vígður sem baptistaprestur árið 1939 og fór svo í Wheaton College í Illinois árið 1940.

Ruth Bell

Í Wheaton kynntist Billy Ruth Bell. Hún var dóttir trúboða og hafði fæðst og alist upp í Kína og ætlaði sjálf að verða trúboði. Það tók Billy um mánuð að safna kjarki til að bjóða henni út. Þau giftu sig 13. ágúst 1943, tveimur mánuðum eftir að hann útskrifaðist, og voru gift í nærri 64 ár. Þau eignuðust fimm börn og einn af þeim, Franklin Graham, tók síðar við þjónustunni af föður sínum.

Ruth var mikil bænakona og stoð og stytta Billy alla ævi. Hann var oft mánuðum saman á ferðalögum og hún hélt heimilinu gangandi í fjöllunum í Montreat í Norður-Karólínu. Billy sagði oft að hún væri sá besti kristni maður sem hann hefði kynnst. Það er auðvelt að gleyma því að á bak við mikla þjónustu er oft fólk sem fórnar miklu í kyrrþey og biður.

Heiðarleiki í Modesto

Billy byrjaði að predika á vegum Youth for Christ eftir stríðið og ferðaðist um Bandaríkin og Evrópu. Á þessum tíma höfðu margir farandpredikarar fengið slæmt orð á sig vegna peninga, siðleysis og ýkjusagna. Árið 1948, á samkomuferð í Modesto í Kaliforníu, settist Billy niður með samstarfsmönnum sínum og þeir báðu og skrifuðu niður hvað það væri sem helst kæmi óorði á predikara. Út frá því settu þeir sér nokkrar reglur sem síðar voru kallaðar Modesto-yfirlýsingin:

1. Að fara heiðarlega með peninga og taka aðeins föst laun í stað þess að taka við gjöfum í eigin vasa.

2. Að gæta sín í siðferðismálum og vera aldrei einn með konu sem ekki væri eiginkona hans, til að gefa aldrei tilefni til gruns.

3. Að vinna með kirkjunum á hverjum stað en tala ekki illa um þær.

4. Að segja satt og rétt frá fjölda fólks og árangri, en ýkja ekki.

Billy og samstarfsmenn hans héldu þessar reglur alla ævi og það er stór ástæða fyrir því að nafn hans stóð hreint í yfir 70 ár í þjónustu. Það er eitthvað sem við getum öll lært af. Það er ekki nóg að hafa smurningu, við þurfum líka að vernda það sem Guð hefur treyst okkur fyrir.

Bæn við trjástubbinn

Sumarið 1949 gekk Billy í gegnum mestu trúarkreppu lífs síns. Góður vinur hans og samstarfsmaður, Chuck Templeton, var farinn að efast um að Biblían væri sönn og orð Guðs. Hann sagði við Billy að trú hans væri of einföld og að hann væri fimmtíu árum á eftir tímanum. Þetta hafði mikil áhrif á Billy. Hann efaðist aldrei um að Jesús væri sonur Guðs, en nú fór hann að spyrja sig hvort hann gæti treyst hverju orði Biblíunnar.

Hann var þá á ráðstefnu í Forest Home, í fjöllunum fyrir utan Los Angeles. Eitt kvöldið fór hann einn út í skóginn í tunglsljósinu, lagði Biblíuna á trjástubb, kraup niður og bað. Hann sagði Guði að það væri margt í Biblíunni sem hann skildi ekki og sumt virtist stangast á við það sem vísindin sögðu, en að hann ætlaði að taka á móti henni sem orði Guðs í trú. Þegar hann stóð upp voru augun hans full af tárum og hann fann fyrir nærveru Guðs og krafti eins og hann hafði ekki fundið í marga mánuði. Ekki var öllum spurningum hans svarað, en baráttunni í hjarta hans var lokið.

2. Tímóteusarbréf 3:16

Sérhver ritning er innblásin af Guði og nytsöm til fræðslu, til umvöndunar, til leiðréttingar, til menntunar í réttlæti,

Það sem gerðist næst er ótrúlegt. Örfáum vikum síðar byrjaði Billy samkomuröð í Los Angeles og þaðan í frá predikaði hann með slíku öryggi og krafti að fólk tók eftir því. „Biblían segir“ varð að einkennisorðum hans. Mér finnst þetta svo mikilvæg lexía fyrir okkur í dag. Þeir sem efast um orðið hafa ekki kraft til að predika það. Chuck Templeton yfirgaf síðar trúna, en Billy valdi að treysta orði Guðs og Guð notaði hann til að ná til heimsins.

Vakningin í Los Angeles 1949

Í september 1949 var reist stórt tjald í miðborg Los Angeles sem fólk kallaði „Strigadómkirkjuna“. Samkomurnar áttu að standa í þrjár vikur og fyrstu vikurnar vakti þetta litla athygli. En svo fór fólk sem margir þekktu að frelsast. Stuart Hamblen, vinsæll útvarpsmaður og söngvari sem lifði villtu lífi, kom kvöld eftir kvöld og gaf Jesú líf sitt að lokum. Jim Vaus, sem vann við hleranir fyrir mafíuforingjann Mickey Cohen, kom fullur efasemda en fann fyrir sakfellingu Heilags Anda og frelsaðist. Louis Zamperini, ólympíuhlauparinn sem hafði lifað af hræðilega fangavist í seinni heimsstyrjöldinni og var að drukkna í áfengi, martröðum og reiði, kom með semingi en gaf Jesú allt sitt líf. Saga hans var síðar sögð í kvikmyndinni Unbroken.

Blaðakóngurinn William Randolph Hearst sagði fréttamönnum sínum að fjalla um Billy Graham og allt í einu var tjaldið fullt af blaðamönnum og myndavélum. Samkomurnar voru framlengdar aftur og aftur og stóðu að lokum í meira en átta vikur. Billy predikaði 65 sinnum fyrir meira en 350.000 manns og um 3.000 manns tóku á móti Jesú. Eftir þetta var Billy Graham þekktur um öll Bandaríkin og heimurinn fór að opnast fyrir honum.

Út um allan heim

Markúsarguðspjall 16:15

Hann sagði við þá: „Farið út um allan heim, og prédikið fagnaðarerindið öllu mannkyni.

Árið 1950 stofnaði hann Billy Graham Evangelistic Association og byrjaði með útvarpsþáttinn Hour of Decision, eða Stund ákvörðunar, sem var sendur út um allan heim í meira en 60 ár. Árið 1954 hélt hann samkomur í London sem stóðu í nærri þrjá mánuði og 1957 predikaði hann á hverju kvöldi í 16 vikur í Madison Square Garden í New York. Árið 1973 komu um 1,1 milljón manns á eina samkomu á Yoido-torginu í Seúl í Suður-Kóreu, sem er stærsta samkoma sem hann hélt. Frá 1977 predikaði hann í nánast öllum löndum austurblokkarinnar, líka í Sovétríkjunum, og árið 1992 fór hann til Norður-Kóreu.

Billy stóð líka fast gegn kynþáttaaðskilnaði á tíma þegar það var alls ekki vinsælt. Á samkomu í Chattanooga snemma á sjötta áratugnum sá hann að sætunum var skipt upp með köðlum eftir litarhætti. Hann reif kaðlana sjálfur niður og ákvað að predika aldrei aftur fyrir aðskildum söfnuði. Árið 1957 bauð hann Martin Luther King Jr. að biðja á samkomunni í New York og árið 1973 sagði hann opinberlega í Suður-Afríku að aðskilnaðarstefnan væri synd. Fagnaðarerindið er fyrir alla og Jesús dó fyrir alla, og Billy lifði eftir því.

Það er gaman að segja frá því að tengingin nær líka hingað heim. Í september 2013 hélt Franklin Graham, sonur Billy, Hátíð vonar í Laugardalshöll í Reykjavík í samstarfi við fjölda íslenskra kirkna. Fræið sem Guð sáði í ungan strák á mjólkurbúi í Norður-Karólínu árið 1934 bar þannig ávöxt alla leið hingað til Íslands.

Auðmýkt allt til enda

Billy var heiðraður meira en flestir menn á hans tíma. Hann var 61 sinni á lista Gallup yfir þá menn sem Bandaríkjamenn dáðust mest að og hann ráðlagði og bað með forsetum Bandaríkjanna í marga áratugi. En þrátt fyrir allt þetta hélt hann alltaf áfram að benda frá sjálfum sér og á Jesú. Hann sagði oft að það eina sem hann gerði væri að segja frá því sem Biblían segði, og að það væri Heilagur Andi sem kallaði fólk fram.

Síðustu samkomuna sína hélt hann í New York árið 2005, þá 86 ára gamall og orðinn veikburða af Parkinsonsjúkdómnum. Ruth dó árið 2007 og Billy bjó áfram á heimilinu þeirra í fjöllunum í Montreat þar til hann fór heim til Drottins 21. febrúar 2018. Hann varð aðeins fjórði almenni borgarinn í sögu Bandaríkjanna til að liggja á viðhafnarbörum í þinghúsinu í Washington, og hann var jarðsettur við hlið Ruth í Charlotte, ekki langt frá mjólkurbúinu þar sem hann ólst upp. Billy sagði sjálfur nokkrum sinnum að einn daginn myndi fólk lesa í blöðunum að Billy Graham væri dáinn, en að það ætti ekki að trúa því, því hann yrði þá lifandi en nokkru sinni fyrr, kominn heim til Drottins.

Hvað getum við lært af lífi hans?

Billy Graham var ekki fullkominn maður og hann sagði það sjálfur. En það sem stendur upp úr er að hann tók ákvörðun við trjástubbinn um að treysta orði Guðs, hann vann að heilindum í öllu og hann boðaði einfalt fagnaðarerindi um krossinn og upprisuna, aftur og aftur, í yfir 60 ár. Hann þurfti ekki að flækja hlutina.

Jóhannesarguðspjall 3:16

Því svo elskaði Guð heiminn, að hann gaf son sinn eingetinn, til þess að hver sem á hann trúir glatist ekki, heldur hafi eilíft líf.

Hefur þú tekið ákvörðun?

Í lok hverrar samkomu bauð Billy fólki að standa upp og koma fram, alveg eins og það var. Ef þú hefur aldrei gefið Jesú líf þitt, þá getur þú gert það núna þar sem þú ert. Segðu honum að þú viljir snúa þér frá syndinni, að þú trúir að hann hafi dáið fyrir þig og risið upp frá dauðum, og biddu hann að koma inn í líf þitt. Ef þú hefur þegar tekið þá ákvörðun, biddu Guð þá um að gefa þér sama traust á orðinu og sömu brennandi þrá til að segja öðrum frá Jesú. Allt getur sá sem trúir!

Myndbönd með Billy Graham

Hér fyrir neðan eru nokkrar af predikunum Billy Graham sem eru einnig á Forðabúrinu. (Á ensku)

Myrkraríkið – The Kingdom of Darkness

Mjór er vegurinn – Narrow is the Road (Calgary 1981)

Tíminn – Time

Er helvíti til? – Is There A Hell? (Sacramento 1983)

“Virðið fyrir yður, hvernig ævi þeirra lauk, og líkið eftir trú þeirra. Jesús Kristur er í gær og í dag hinn sami og um aldir.” Heb 13:7-8